जुम्लाको चन्दननाथ नगरपालिकाका किसानहरुलाई स्याउको उपयुक्त भण्डारणको लागि क्यारेट प्रदान गरिएको छ । भण्डारणको विकल्पको रूपमा जमिन मुखी खाल्डामा स्याउ खाल्डा हाल्दा र निकाल्दा दाग लागेर कुहिने समस्याले आजित किसानहरुले क्यारेट पाउ“दा निकै उत्साहित छन ।
चन्दननाथ २ की सिमकली भण्डारीले उत्पादन संगै भण्डारणको व्यवस्थापन नहुंदा उत्पादन अनुसारको फाइदा लिन नसकेको बताइन् । स्याउमा आत्मनिर्भर जुम्लामा शुन्य शित भण्डारको व्यवस्था छैन । जसका कारण उत्पादित वस्तुको भण्डारण तथा बजारीकरणमा समस्या रहेको छ ।
स्याउ भण्डारणका लागि क्यारेट पाएपछि जुम्लाका १ सय २० समूहका सयौं किसान खुसी भएका छन् । अब स्याउ भण्डारणका लागि चिन्ता लिनु नपर्ने र कुहिने डरबाट पनि मुक्त पाएको उनीहरुले बताएका छन ।
किर्डाक नेपालले जुम्लाका १ सय २० किसान समूह लाभान्वित हुने गरी एक हजार नौ सय स्याउ भण्डारण गर्ने क्यारेट वितरण गरेको जनाएको छ । जुम्लामा उत्पादित स्याउ, आलु लगायतको वस्तु भण्डारणमा देखिएको समस्या र किसानले भोग्नु परेको घाटालाई मध्यनजर गर्दै एक हजार नौ सय क्यारेट वितरण गरिएको किर्डाक नेपालकी फिल्ड अधिकृत सरु महतले बताइन् । उनका अनुसार किसानले उत्पादन गरेको स्याउ आलु भण्डारणमा निकै सहजता आउने भएको छ ।
जुम्ला सदरमुकाममा निर्माण भएको बहुउदेश्यीय कैलास कोल्डस्टोरलाई क्यारेट हस्तान्तरण दिइएको छ । जिल्लाभरका किसानले उत्पादन गरेका स्याउ कोल्डस्टोरमै भण्डारण गर्ने छन् । अनुकुलता अनुसार बिक्रीका लागि २५ प्रतिशत अनुदानमा लिनेछन् । विद्युत अभावले सञ्चालनमा आउन नसकेको कोल्डस्टोर क्यारेट वितरणसंगै सञ्चालनमा आउने र किसानको उत्पादन सुरक्षित हुने आशा पलाएको छ ।
जिल्ला किसान समूहको उपस्थितिमा १९ सय क्यारेट कोल्ड स्टोरलाई हस्तान्तरण गरिएको हो । १६ लाख २० हजार बढीको लागतमा खरिद गरी १९ सय क्यारेट तातोपानी तिला र चन्दननाथका एक सय २० किसान समूहलाई हस्तान्तरण गरिएको हो । किसानको उत्पादन सुरक्षित गर्न,उत्पादन बृद्धि गर्न, बजार प्रवर्द्धन गर्न तथा श्रमनुसारको मूल्य पाउन् भन्नका लागि क्यारेट वितरण गरिएको फिल्ड अधिकृत महतले बताइन् ।
जिल्ला समन्वय समितिका प्रमुख गौरीनन्द आर्चायले कर्णालीकै ठूलो बहुउदेश्यीय कोल्डस्टोर निर्माण हुनु गौरवको कुरा भएपनि बिजुली अभावले सञ्चालनमा नआउनु दुःखद भएको बताए । किर्डाकले किसानको उत्पादन सुरक्षा, जीविकोपार्जन तथा उत्पादन बृद्धिका लागि गरेको काम प्रशंशनीय रहेको उनको भनाई छ ।
चन्दननाथ नगरपालिकाकी उपमेयर रामदेवी खड्काले जुम्लाको आर्थिक समृद्धिको आधार भनेकै स्याउ खेती भएको बताइन् । स्याउको उत्पादन बृद्धि, सुरक्षित भण्डारण तथा बजारीकरणमा ध्यान दिनु पर्नेमा जोड दिदै उनले कोल्डस्टोर भित्रै पनि स्याउ सुरक्षित हुने एकिन नभएकोले सबै किसानलाई बिमाको पहुंचमा पु¥याउनु पर्ने तर्क राखिन् । किसानको उत्पादनलाई बजारीकरण गर्न हाट बजार सञ्चालन गर्ने तयारी भइरहेको समेत उपमेयर खड्काले जानकारी दिइन् ।
उद्योग वाणिज्य संघ जुम्लाका अध्यक्ष पुरीचन्द्र देवकोटाले बहुउदेश्यीय कोल्ड स्टोरको ५० प्रतिशत विद्युत महसुल छुट गराउन पहल भइरहेको बताए । नीजि क्षेत्रले किसानलाई बजारसंग जोड्ने र उत्पादन बृद्धिका क्षेत्रमा काम गर्न पनि सहजीकरण गरिरहेको उनले जानकारी दिए । कोल्ड स्टोरमा स्याउका चाना र जुस बनाउने मेसिन समेत जडान छ । तर बत्ति अभावले सञ्चालनमा आउन सकेको छैन ।
क्यारेट वितरण कार्यक्रममा जनप्रतिनिधिहरु,किसानहरु लगायतका सरोकारवालाहरुको उपस्थिती रहेको थियो ।
