जुम्ला। स्वतन्त्र विद्यार्थी युनियन (स्ववियु) जुम्लाको आयोजनामा प्रथम खुला स्ववियु भलिबल प्रतियोगिता सुरु भएको छ। प्रतियोगिताको उद्घाटन खेल जुम्ला बहुमुखी क्याम्पसका कर्मचारी र पत्रकार टोलीबीच मैत्रीपूर्ण रूपमा सम्पन्न भएको थियो।
उद्घाटन खेलमा पत्रकार टोलीले उत्कृष्ट प्रदर्शन गर्दै क्याम्पस कर्मचारी टोलीलाई सोझो दुई सेटमा पराजित गरेको छ। स्ववियु सभापति लोकेन्द्र बुढाका अनुसार प्रतियोगितामा कुल ९ वटा टोली सहभागी रहेका छन्।
प्रतियोगितामा प्रथम हुने टोलीले नगद १ लाख १ हजार १ सय १ रुपैयाँसहित मेडल, ट्रफी र प्रमाणपत्र प्राप्त गर्नेछ भने दोस्रो हुने टोलीले ५१ हजार १ सय १ रुपैयाँ नगदसहित मेडल, ट्रफी र प्रमाणपत्र हात पार्नेछ।
उद्घाटन समारोहलाई सम्बोधन गर्दै चन्दननाथ नगरपालिका जुम्लाका प्रमुख राजुसिंह कठायतले खेलकुदले मानिसलाई शारीरिक तथा मानसिक रूपमा स्वस्थ राख्न महत्वपूर्ण भूमिका खेल्ने बताउनुभयो। साथै, उहाँले प्रतियोगितालाई अनुशासित, व्यवस्थित र मर्यादित ढंगले सञ्चालन गर्न आयोजकलाई आग्रह गर्नुभयो।
