मोटरसाइकल दुर्घटनामा बुढाको निधन
जुम्ला पातारासी गाउँपालिका ५ निवासी २९ वर्षीय मीनबहादुर बुढाको मोटरसाइकल दुर्घटनामा परी ज्यान गएको छ । शनिबार राति साढे ८ बजेतिर पातरासी ५ को तल्ली लोर्पा नजिकै क १ प २०७७ नम्बरको मोटरसाइकल दुर्घटना हुँदा उहाँको ज्यान गएको हो । दुर्घटनामा परी गम्भीर घाइते बुढाको कर्णाली स्वास्थ्य विज्ञान प्रतिष्ठान जुम्लामा उपचारका क्रममा मृत्यु भएको जिल्ला प्रहरी कार्यालय जुम्लाका सूचना अधिकारी उमेस चन्दले जानकारी गराउनु भयो ।
उहाँका अनुसार साँघुरो र अप्ठयारो सडकमा मोटरसाइकल अनियन्त्रित भई दुर्घटना हुँदा बुढाको ज्यान गएको बताउनु भयो । मोटरसाइकल सडकबाट करिब ७५ मिटर तल जुवा नदीमा खसेको चन्दको भनाइ छ ।
