दैलेख : नेपाल कम्युनिस्ट पार्टी एमाले दैलेखको अध्यक्षका लागि नन्दकिशोर बस्नेतले उम्मेदवारी घोषणा गरेका छन्। आज एक कार्यक्रमबिच बस्नेतले जिल्ला अध्यक्षमा उम्मेदवारी घोषणा गरेका हुन्।
उम्मेदवारी घोषणा गर्दै बस्नेतले दैलेखमा एमालेलाई सशक्त बनाउन जिल्ला अध्यक्षमा आफ्नो उम्मेदवारी दिने बस्नेतले बताए। उनले दैलेखका एमालेजनले फरक नेतृत्व चाहेका र जिल्लाको विकास गर्न नेतृत्व पुस्तान्तरण हुनुपर्ने बताए।
औद्योगिक क्षेत्र व्यवस्थापन लिमिटेडका अध्यक्ष समेत रहेका बस्नेतले राजनीति गर्ने व्यक्ति इमानदार भए देश विकास गर्न कसैको मुख ताक्नु नपर्ने बताए।
‘ढाँट, छल गरेर भन्दा पनि जनताका समस्या समाधानतर्फ लाग्नु राजनीतिक नेतृत्वको पहिलो कर्तव्य हो’, उनले भने।
जिल्ला अध्यक्षका लागि भूमि आयोगका पूर्व जिल्ला अध्यक्ष सूर्यबहादुर शाहीले पनि अध्यक्षमा उम्मेदवारी दिने बताए।
एमालेका जिल्ला अध्यक्ष रहेका प्रतिनिधिसभा सदस्य रवीन्द्रराज शर्माले पनि अध्यक्षमा पुनः इच्छुक देखिएका छन्। जिल्ला नेताहरूले भने दैलेखमा एमालेको नयाँ नेतृत्व सहमतिका माध्यमबाट चयन गरिने बताउँदै आएका छन्।
