नेपाली कांग्रेसका सभापति शेरबहादुर देउवा दोस्रो कार्यकालका लागि सभापतिमा निर्वाचित भएका छन्। १४औं महाधिवेशनअन्तर्गत मंगलबार राजधानीको राष्ट्रिय सभागृहमा भएको दोस्रो चरणको निर्वाचनमा नेता शेखर कोइरालालाई ९सय ७ मतले पछि पार्दै देउवा सभापतिमा दोस्रोपटक निर्वाचित भएका हुन्। २ हजार ७ सय २४ देउवाले मत पाएका छन् भने निकटतम प्रतिद्वन्द्वी कोइरालाको १ हजार ८ सय १७ मत छ। ३३ मत बदर भएको थियो।
सोमबार भएको निर्वाचनमा पार्टी विधानको व्यवस्थाअनुसार ५० प्रतिशतभन्दा बढी मत कुनै पनि उम्मेदवारले नपाएपछि मंगलबार दिउँसो साढे तीन बजेबाट पुनः निर्वाचन भएको हो। नेतृत्व छनोटका लागि भएको मतदानमा सोमबारभन्दा १ सय ३१ भोट अर्थात् ४ हजार ५ सय ७४ महाधिवेशन प्रतिनिधिले मतदान गरेका थिए। सोमबार भएको निर्वाचनमा ४ हजार ६ सय ८१ महाधिवेशन प्रतिनिधि नेतृत्व चयनमा सहभागी थिए।
७५ वर्ष लामो कांग्रेस इतिहासमा सभापतिमा पराजित हुने शेखर कोइराला परिवारको दोस्रो सदस्य हुन्। २००९ सालमा भएको कांग्रेसको पाँचौं महाधिवेशनमा बिपी कोइराला, मातृकाप्रसाद कोइराला र केदारमान व्यथितबीच प्रतिस्पर्धा भएको थियो। त्यसमा मातृकालाई पराजित गर्दै बिपी सभापतिमा निर्वाचित भएका थिए। बिपीले २ सय ९८, मातृकाले ६८ र व्यथितले २ मत मात्र पाएका थिए। त्यति बेला मातृका कोइराला परिवारकै बिपीबाट पराजित भएका थिए। शेखर भने कोइराला परिवारबाहिरका नेतासँग पराजित हुने पहिलो सदस्य हुन्।
कृष्णप्रसाद कोइरालाका नाति तथा केशव कोइरालाका छोरा शेखर पार्टीभित्रका विभिन्न नेताहरुलाई मात्र होइन, आफ्नै परिवारका दुई सदस्य शशांक र सुजाताको पनि विश्वास जुटाउन नसक्दा पार्टी नेतृत्वमा पुग्न चुकेका हुन्। नयाँ नेतृत्वका लागि सोमबार भएको निर्वाचनमा देउवा ८२ मतले सभापतिमा निर्वाचित हुन चुकेका थिए। उनले २ हजार २ सय ५८ मत पाएका थिए।
प्रतिस्पर्धामा रहेका पाँच नेतामध्ये शेखर कोइरालाले १ हजार ७ सय २१ मत पाएका थिए भने प्रकाशमान सिंहले ३ सय ७१ मतसहित तेस्रो स्थान सुरक्षित गरेका थिए। त्यस्तै विमलेन्द्र निधि २ सय ४९ मत ल्याए भने कल्याण गुरुङ २० भोटमा समेटिएका थिए। विधानको व्यवस्थाअनुसार सभापतिमा निर्वाचित हुन उम्मेदवारले ५० प्रतिशतभन्दा बढी मत ल्याउनुपर्ने हुन्छ। कुनै पनि उम्मेदवारले आवश्यक मत पाउन असफल भएपछि धेरै मत पाउने वर्तमान सभापति देउवा र नेता कोइरालाबीच दोस्रो चरणमा प्रतिस्पर्धा भएको थियो।
