सल्यान : सल्यानका ८३ वटै वडामा सडक पुगेको छ। हिउँदमा सबैतिर सवारी साधन चले पनि वर्षा याममा भने अधिकांश सडकमा सवारी साधन नचल्दा सर्वसाधरणहरु पैदल हिँड्न बाध्य छन्।
वर्षाले मुख्य राजमार्गको रुपमा रहेको राप्ती लोकमार्गसहित सबै सडक बिगारेपछि स्थानीयवासीले सास्ती भोग्दै आइरहेका छन्। कतै खोलाले सडक कटान गरेको छ भने कतै पहिरोले सडक बगाएको छ।
घर अगाडि सडक पुगे पनि पैदल हिँड्नु पर्ने बाध्यता रहेको स्थानीय रीमबहादुर बुढाले बताए। १८ वर्षअघि सल्लीबजार चौरजहारी सडकको ट्रयाक खुले पनि स्तरोन्नति नहुँदा समस्या भोग्दै आइरहेको उनको भनाइ छ।
सडक खन्ने नाममा जथाभावी सडक खनिँदा पनि समस्या आएको दर्मा गाउँपालिका–३ का कृष्ण बुढाथोकीले बताए। उनले भने‚ ‘पुराना सडक कहिल्यै स्तरोन्नति हुँदैनन्। सडक निमार्णमा करोडौं खर्च हुने गरे पनि दिगो समाधान खोजिएको छैन।’
सडकमा नाली नबनाउनु, नाली बनाए पनि पानी बग्ने गरी नबनाउनुले पनि सडक बिग्रिएको सर्वसाधरणहरु बताउँछन्।
