जुम्ला — जिल्ला प्रहरी कार्यालयले भरुवा बन्दुकसहित एक जनालाई पक्राउ गरेको छ । गुठिचौर गाउँपालिका-१ का ३२ वर्षीय सुर्यबहादुर महतारालाई भरुवा बन्दुकसहित पक्राउ गरेको हो ।
उनी पातारासी-३ लासी बजारमा मोटरसाइकल ग्यारेज खोलेर बसेका थिए । महताराले अवैध भरुवा बन्दुक लुकाइछिपाइ गरेर राखेको सुचनाका आधारमा प्रहरीले अनुसन्धान सुरु गरेको थियो ।
जिल्ला प्रहरी कार्यालयका प्रमुख डिएसपी छेदीलाल कामतीले गुठिचौर-१ मौरे लेकस्थित जुम्लादेखि डोल्पा जाने सडकको ५० मिटर तल ओढारमा लुकाइराखेको अवस्थामा बन्दुक बरामद भएको बताए ।
उनका अनुसार बन्दुक तीन पार्टमा विभाजन गरेर सेतो प्लाष्टिकको बोरामा राखिएको अवस्थामा भेटिएको थियो । अवैध बन्दुक प्रयोग गर्ने महतारा माथि अनुसन्धान सुरु भइसकेको प्रहरीले जनाएको छ ।
