सुर्खेत । सल्यानमा एक व्यक्तिले दारु लतमा लठ्ठ भएको बेला श्रीमतीको धारिलो हतियारको प्रयोग गरेर हत्या गरेका छन् । सल्यानको कुमाख गाउँपालिका–५ तिमिलका ४७ वर्षीय कविराम खड्काले मादक पदार्थ सेवन गरी आफ्नै श्रीमती ४२ वर्षीय कली खड्काको हत्या गरेका हुन् ।
घटना लगत्तै ईलाका प्रहरी कार्यालय राँगेचौरबाट गएको टोलीले कविरामलाई नियन्त्रणमा लिएको कर्णाली प्रदेश प्रहरी कार्यालयले जनाएको छ । प्रहरीको प्रारम्भीक अनुसन्धानका क्रममा कविरामले अत्यधिक मदिरा सेवन गरेको र घरासयी विवाद बढ्दै जाँदा श्रीमतीको हत्या गरेको खुलेको छ । ‘प्रहरीलाई शुरुमा कली गम्भीर घाइते भएको खवर प्राप्त भएको रहेछ,’ प्रदेश प्रहरी कार्यालयका प्रवक्ता माधवप्रदास श्रेष्ठले भने, ‘प्रहरी घटनास्थलमा पुग्दा उहाँको मृत्यु भइसकेको थियो ।’ कविरामलाई नियन्त्रणमा लिएको र घटनास्थल सुरक्षित राखेर थप अनुसन्धान अघि बढाइएको प्रदेश प्रहरीले जनाएको छ ।
